Në panoramën e librave poetikë, cikleve të vjershave dhe poezive që qarkullojnë do të veçoja, mikun e Urës Letrare, poetin Andris Lleskai. Natyrisht ka shumë poetë të tjerë për të cilët do shkruaj në vazhdim, por sot po ndalem tek Lleskai. Një poet i cili e ka në shpirt poezinë, madje dhe me tepri.
Gjuha poetike është një veçori që sipas mendimit tim shumë nga poetët e sotëm e injorojnë duke harruar se poezia pikërisht falë gjuhës, figurës retorike dhe rimës ndryshon nga proza. Poeti, Andris Lleskai, i qëndron besnik veçorive të lartpërmendura madje i shton poezisë së tij edhe ritmin sipas temës që ka zgjedhur sepse siç shprehet vetë në vargjet e tij:
“Një Poet jeton e është i gatshëm që të vdesë për çdo gërmë”.
Jam tejet i bindur, që Lleskai është i rrethuar nga fjalorë të shumtë në tavolinën e tij të punës sepse kjo duket në poezitë e shumta të tij, që paraqiten me një fjalor të pasur.
A pëlqehet nga të gjithë poezia e Andris Lleskai?…
Poezia është edhe një mundësi e madhe e dialogut ku poeti kërkon të sjellë ndijimet e tij në mënyrë që të kuptohet nga personat e tjerë, pra nga lexuesit. Ka raste kur poezia e tjetrit shihet me smirë a zili, hera-herës ngjall një lloj rivaliteti mes vetë poetëve dhe prandaj, dhe ndoshta pikërisht për këto arsye në faqen e Ura Letrare do të përpiqemi të jemi sa më pozitiv me njëri-tjetrin. Kjo nuk do të thotë aspak që të lëvdojmë medoemos krijimet tona me fjalë të bukura dhe boshe.
Jo!….
Andris Lleskai i shemb tabutë me vargjet e tij dhe nuk ka aspak frikë që të vendosë gjithçka duhet në poezi për të prekur shpirtin e lexuesit.
I mbështetur fort në identitetin e tij, në atdhedashurinë e pakufishme, shoqëruar këto me një vullnet për pasurimin gjuhësor, që e përcjell në vargjet e tij, më bën të mendoj se poeti Andris Lleskai ka një rrugë të gjatë dhe të ndritshme përpara tij.
Ne miqtë e tij të Ura Letrare i urojmë suksese!
Nga ILIRIAN DAHRI,
Diplomuar në Universitetin e Torinos në Fakultetin e Letërsisë dhe Filozofisë me titullin Dottore Magistris.
Përfunduar Akademinë Diplomatike. Ministria e Punëve të Jashtme.
Përgjegjës i Administratë/Financës pranë Q.K.SH.S. Ministria e Kulturës.
Anëtar i Bordit Botues të Q.K.SH.S. Ministria e Kulturës.
Diplomat i Republikës së Shqipërisë pranë Selisë së Shenjtë. Vatikan.
Shef i zyrës konsullore dhe kulturore pranë Selisë së Shenjtë. Vatikan.
Zv/drejtor. Bashkia Tiranë.
Këshilltar i Ministrit të Energjisë dhe Industrisë.
Botuar romani “LIRIJA”. Pegi 2022. Me të cilin ëshhtë paraqitur në Panairin e Zyrihut, në Panairin Tirana 2022, pjesmarrës në Çmimin Letrar Ndërkombëtar “At Zef Plumi”.
Përkthimi të poetëve dekadentë italianë Pascoli dhe D’Annunzio botuar në gazetën Letrare ExLibris. (Gati për botim libri me poezi të përkthyera në shqip nga autorët Pascoli dhe D’Annunzio).
Bashkëpunuar me Istitutin e Gjuhës dhe Letërsisë shqipe në Universitetin e Palermos me Profesorët Antonino Guzzetta dhe Matteo Mandalà.
Pjesmarrës në Itali në Konkursin me tregime pranë gazetës “La Repubblica”.
Gazetar e shkrimtar i shtypit shqiptar dhe atij italian ku ka botuar poezi, tregime, ese, kritika letrare, etj…
