Numri i aksidenteve të ndodhura në linjat hekurudhore të vendit ka qenë i lartë, megjithëse, fatmirësisht, pa pasoja në jetë njerëzish. Rasti më i fundit ishte ai pranë Shkëmbit të Kavajës, pak ditë më parë, ku treni goditi një automjet, ku brenda gjendeshin gjashtë persona. Kjo ka sjellë edhe njëherë në vëmendje problemin dhe rrezikun që shkaktojnë kalesat e paligjshme mbi linjat hekurudhore. Ndërhyrjet për prishjen e tyre kanë qenë të shpeshta, por jo shumë të suksesshme, dhe tani alternativa e vetme që ka mbetur është rrethimi i shinave në të dy anët e tyre.